هادي أنا

بواسطة إيناس مليباري

السّــلام عليكم ورحمة الله وبركاته

قررت إنو التدوينة دي تكون باللهجة العامية/ الجداوية البحتة ^^ عشان تكون قريبة من الكل ، اللي خلاني أقرر أكتب التدوينة دي هوا نقاش دار – ولف واتسلق كمان ههههه –  بيني وبين أكتر من صحبة – ياربي متعودة أقول صديقة وكلام مرتب ^^ – فقلت نوسّع دائرة النقاش .

تساؤلات : كيف يُظهر الإنسان شخصيتو الحقيقية اللي بحياتو الواقعية ويعكسها بالنت ( العالم الوهمي / الافتراضي ) ؟ هل الإنسان اللي شخصيتو ف الواقع مرح ومحشش وف النت ال ال الاحترام يعتبر شخصية متناقضة وغير سوية – ومستويّة ^^ ؟ هل نقدر نحكم على شخصية الكاتب اللي بالنت من خلال كتاباتو بس ؟


وجهة نظري هيا : إنو النت يفرض علينا حدود ما يسير نتجاوزها لأسباب كتيييرة ! ما أقصد انو الواحد يخفي شخصيتو ويرتدي اووبس اقصد يلبس ^^ قناع عشان النت مرة عالم وهمي ! أقصد إن النت له خفايا وأبعاد مالها حدود ، فهادا الشي يخلينا امممم ايش يسموه .. يخلينا نتحفظ عن بعض جوانب شخصيتنا :”) .

فـ اللي يشوف إيناس بالنت ويقرأ لها .. كلام منمق ومدري ايشكلو ! لو شافني بالواقع يمكن تجيلو صدمة عمرو ! لأن التنميق والتزبيط والكلام دا بس كتابة لكن بالواقع طبيعي الإنسان يكون على طبيعتو يضحك ويحشش >> كأنها تدافع عن نفسها ^^ ! الحياة مو كلها جدّ ومو كلها ضحك . ضروري الإنسان يوازن بينهم ، وزي كدا الإنسان مراح يكون جدّي في كتاباتو ومع أصحابو وف شغلو .

وحدة من صحباتي قالتلي إنو شخصيتك يا إيناس مرة غير !! يعني لو إني ما شفتك بالواقع حقول انك مثقفة وحقت كتابة وبس لكن لما شفتك بالواقع قلت هادي ماف راسها شي << طبعاً ما أقولكم كمية التحطيم اللي شعرت بيها بس الله جبر بخاطري ههههه . ووحدة تانية الله يستر عليها – أتمنى تكون تقرأني دحيين – قالت لي : استغرب من الناس اللي يحكموا على الكاتب من كتاباتو بس ويجزموا انو انسان كويس ومافي زيو ! يعني مثلاً انتي يا إيناس مررة مو انتي اللي تكتبي !! << طبعاً قالت كلام تاني بس لهنا وكفاية هههه أحس هيبتي طاحت و طيحتها بيدي ههههه .

وعن نفسي قابلت مدونتين عرفتهم من النت ، وحدة منهم سبحان الله أسلوب كتابتها بالمدونة من ناحية الجدية هيا هيا نفسها ماحسيت باختلاف أو فرق . أما التانية هههههه حبيبتي والله طلعت من جماعتي فيها من التحشيش ما الله به عليم فـ حسيت اني طبيعية وانو بجد الناس مو كلها زي بعض .

ضروري نتقبل بعض على اختلافاتنا ، حتى لو كنا نتوقع من الطرف التاني انو احسن مما كنا نحسّبو ! . حلو نحسن الظن بالتانيين ف كل حاجة مو نقول هادا والله همو رضا الناس عشان كدا يزبط كتاباتو وبس ! ، وخليني أتكلم عني وح أنصّب نفسي نائبة عن الناس اللي زي حالتي ( محششين ويضحكوا بالواقع وأنتكة بالنت ) أقولكم اننا لما ننمق الكلام ونظهر الشي الكويس اللي فينا هادا لأنو الإنسان يعطي كل ذي حق حقه ، ولا إفراط ولا تفريط ، يعني حلو يكون في شي جدي تشتغل عليه ف حياتك ( مواهبك ، هواياتك ، طموحاتك .. الخ ) وكمان حلو يكون في وقت فَنْ تنسى فيه انك كاتب وانك مدير ووزير ..  حبايبي الحياة فيها رمادي مو يا أبيض يا أسود :”)

لكل الزائرين اللي عرفوني عن طريق النت وشافوني بالواقع : كيف لقيتوني ؟  ولكل الزائرين اللي ما حصلهم الشرف – ويحمدوا ربهم ليل نهار هههه – انهم يشوفوني : هل توقعتوا انو إيناس هيا إيناس اللي تكتب ؟

شكراً لكل اللي اتقبلوني بكل ( تناقضاتي ) بين النت والواقع

حاجة تضحّك ، –

راجعت التدوينة أكتر من مرة عشان أتأكد انو مافيها ولا مصطلح بالفُصحى ، أحس كأني بسوي ذنب كبير ^^ !

You may also like

15 تعليقات

حسن محمد باتي 9 نوفمبر 2011 - 7:11 ص

صحيح كلامك مو لازم تكون شخصية الواحد هيا نفسها في النت وفي الواقع , أصلاً في الحياة الواقعية الواحد شخصيتو تختلف في كل دور من أدواره فلما يكون دورك معلم طريقك وأسلوبك في التعامل غير لمن تكون مع زوجتك غير لما تكون مع أمك وأبوك مثلاً في دور يفرض عليك فيه بعض الحزم ودور يفرض عليك التفاهم ودور يفرض عليك الخضوع والتذلل, كل دور من أدوارك في الحياة يحتاج تكون شخصيتك غير , ودا مو نفاق دي طبيعة الحياة وطبيعة البشر , وما أخبي عليكي إني أنا أحيان أحس إنه في شي غلط وأحاول أكون زي ما أنا بطبيعتي بس فعلاً ما أقدر دايماً في قيود وإشكالات تفرض عليكي بعض من التغيير والتكييف.

تدوينة تجنن وفعلاً الواحد كان مفكرك ستنا المثقفة =)

Reply
متطوعة 9 نوفمبر 2011 - 7:16 ص

O_o لحضات لأستوعب التغيير الهائل الذي يحدث الأن ..
عفوا هل المتحدثة إيناس بهيبة قلمها .. 🙂
بما أني من الفتيات اللاتي تعرفن على إيناس أولاً عن طريق النت ثم قابلتها وأصبحت صديقة عزيزة جدا فأنها مختلفة جداً عن ما تشاهدونها في مدونتها فـ هنا الأنتكه وهناك الصربعة.

هل في أمكانية التعريف بالفتاتين بما أن الطابق المستور قد أنكشف :$

Reply
متطوعة 9 نوفمبر 2011 - 7:22 ص

بالمناسبة أشعر الأن أنني فعلا أقف أمام إيناس :$

Reply
Ratanya 9 نوفمبر 2011 - 7:24 ص

دحين انا ما اعرف ايناس لكن وصلني رابط التدوينه عن طريق تويتر

وحبيت تدوينتك مررررره حسيتك قلتي اللي قاعده احاول اوصله من زمان
يختي تعالي ابوس راسك على هادي التدوينه 

مره عجبتني 

Reply
سوناتا 9 نوفمبر 2011 - 9:56 ص

وعليكم السلام ورحمة الله وبركاته
يأاااه ياإيناس أنا آسفة
بأعترفلك مرة كنت أكلم صديقة تتابع مدونتك وقلتلها أنتي على بالك إيناس في الحقيقة كذا تراها قالتللي استغفر الله شفتها البنت ممتازة قلتلها لا لا ماتعرفيها بحق ~لووووووول~
احبك إيناس بكل تحملينه من أقنعة واحترم. هدا التنوع وأراه نقطة في صالحك مو ضدك
ودايما” يكون النت متنفس لنا ونافذة نضع فيها مانحب أن نكون ومانحب أن نقول ······
فلاتقلقي من هذا التفاوت ····
يعني أنا اللي أرد عليك ···· نفسي اللي في الحقيقة [الله يستر]ههههههههه

Reply
إينـاس مليبـاري 10 نوفمبر 2011 - 2:28 ص

حسن ؛
ياسلام على كلامك ، بجد الله ينور عليك حسن ،
جبتها ع الجرح ، تعليقك اضافة وشرح أكتر للتدوينة :”)
شكراً لحضورك ، ومرحبمبو ^^

مهاوي ؛
حبيت أسترك بس انتي تبي الفضيحة هههههههه
ياجماعة الخير ترى المدونة المحششة هيا مها ههههه
ارتحتي كدا نفسياً واجتماعياً وسياسياً ههههه << مسكت خط تحشيش ياربي بس أشوفك كل هيبة فيا تخربي أمها وأبوها هههههههههه يسعدك مهاوتي صديقتي المحششة واللي أشعر معاها ان الدونيا بخير كبير وكتير :") Ratanya ؛ ياقلبي انتي يسعدك ربي :") يلا تعالي بوسيني لو سمحتي ، أحب التطبيق العملي هههههه ياربي دايماً أقدر أوصل حاجة ف نفوس ناس كتتتير :") ومرحبا بحضورك :") سوناتا ؛ لأ لأ كدا حنخسر بعض يابت هههههههه ، كدا يهون عليكي تخليني ف أسفل السافلين ههههه ، يسعدك حبيبي سوناتتي انتي ^^ وأنا بحبك وبحب احتواءك اللي مالقيت زيو :") وعن انك نفسك اللي ف الواقع .. للان انا اشهد انو مرررة انتي هههه استمممري اهم شي ^^

Reply
متطوعة 10 نوفمبر 2011 - 3:10 ص

كانت لدي بعض الشكوك ولكن أردت التأكد .. أذن عرفت من هي الفتاة الثانية 🙂
<< هرمون اللقافة مرتفعة جداً :/

Reply
ياسر 10 نوفمبر 2011 - 3:53 ص

حتى آخر لحظة (ملاحظتك الأخيرة ) أدركت أنك كتبتي بالعامية بتاعكم (لأني من الجزائر و مو مفروض افهم لهجتكم بالمرة) إلا أني الحين أكتب بها ، و اكتشفت أني أفهمها عادي مثلها مثل لهجتها العامية اللي لو تكلمت بيها ما راح تحصلون شيئ ، أظمن لكم هذا .

بالنسبة لفرق شخصيتك شيئ طبيعي (من قبل ما تكتبين الموضوع ده) و أنا فاكر أنك مرحة و محششة و حيوية و ما تستطيعين الجلوس في مكان واحد لمدة 5 ثواني – اللهم إلا تعذر التنقل (لا قدر الله)

Reply
lady beba 11 نوفمبر 2011 - 3:36 ص

ايناس حبيبتي..

أعرفك واحبك بكل مافيكي وبجميع اقنعتك المخبصه والمرتبه والمكركبه والمزركشه..

واتمنى انك تفضلي على ما انتي عليه ..

لان فعلا ايناس جميله .. =) فلا لوما لطالبين ال ود …!!

Reply
a7baby 11 نوفمبر 2011 - 7:07 ص

فعلاً حصـلت لي ؛
كل من رآني و تحدث إليّ كان يخبرني أني غيير على الواقع
حتى إخــوتي >_>
و الله العالم بـ كمّ التحطيم الذي أودعوه في نفسي بكل براءة ..

لكن صدقيني نحن هم نحن على الواقع أو في الانترنت و لم نلبس أقنعة و لا نعاني انفصاماً و لا تناقض ..
لكن هذا جـانبٌ فينا لا نستطيع إظهاره إلا هُنا ..
جربي أن تتحدثـي لأحدهم كما تتحدثين هُـنا ..
سيتعجبُ كثيراً و يستنكرُ ذلك و سيطالبك أن تعودي كما كنتِ ” طبيعية ” .. ! !

لذلك – برأيي-ليس بإمكاننا أن نتحدث مع من حولنا بكل أنـتكة و فخـامة كما نفعل هنا في هذا العالم الـ غير .

تدوينة أحببتُها كثيراً .. دمتِ بـ ود !

Reply
سوسن امين 12 نوفمبر 2011 - 1:30 م

معرفة الانسان في الواقع شيء مختلف لأن أنا شايفاه بعيني أعرف تصرفاته في المواقف المختلفة,كلامه مش الجد بس كمان الهزار , لكن الكلام على النت بيبقى في مواضيع محددة باقول رأيي في شيء محدد في وقت قصير , النت مش هي كل الحياة , لكن في الحياة الواقعية لو سألتيني عن نفس الموضوع حاقول نفس رأيي اللي قلته على النت, وشكرا لموضوعاتك الجميلة

Reply
إينـاس مليبـاري 14 نوفمبر 2011 - 7:23 م

متطوعة ؛
ههههههه جيدة انتي ف الشكوك والتحقيق
أشك انك تقربي للمحقق كونان من وراانا ^^ !

ياســـر ؛
هههههههههه لالالا كدا كتير عليا !! ^^
أجلس كتير عادي بس حركاتي كتيرة جداً ^^ !!
حبيت سبرك لأغوار ما وراء الكتابة :”)
وعن لهجتكم ماعندي خلفية عنها بس كان نفسي تكتب لنا ولو
جملة ونحاول نفهمها :”)
شكراً ياسر :”)

برو ؛
وأنا بحبك بكل أحوالك ، يازييين هالحكي بس فديتك :”)
شكراً يـ جممميلتي على حضورك :”)

أحبابي ؛
اي والله صدقتي يعني ياجماعة الخير خلونا على طبيعتنا أحسن
ما تجيكم حالات نفسية ^^
أنا لما أكون مرة جادة بالكلام مع بعض من صحباتي وبدون ما أضحك
لفترة طووويلة بالنسبة لإيناس يقولولي ( تخوّفي ) ! ^^

سوسن ؛
الله ينور عليكي :”)
كلامك صحيح جداً وياريت الكل يستوعب الشي دا ،
لكل مقام مقال :”)
سوسن ، أحب رأيك ()

Reply
مرثد 18 نوفمبر 2011 - 12:39 ص

السلام عليكم ورحمة الله

كلامك أختي إيناس صحيح، الواحد أحياناً يشعر إنو هل أنا جدي زيادة عن اللزوم في كتابة تدويناتي؟
بس تظل كما ذكرت حضرتك: إنو العالم الافتراضي فيه يقود لازم الواحد يحترمها.

وأضيف: إنو الواحد في حياتو بيعرف يعدل شخصيتو حسب إللي قداموا. يعني: لو كان مع دكتور من دكاترته مثلاً ما يصلح يبين إنو فلة زيادة على اللزوم.
في حين إنو في المدونة مو نحن إللي بنختار مين يقرأ كلامنا..

أنا كذلك أحياناً أخوي الصغير يقول كلمات مثل ما قالت صديقتيك لك ( أما أنا فلن أذكر ما قيل ) 🙂
ويجمع الكلام جملتك:
“الحياة مو كلها جدّ ومو كلها ضحك . ضروري الإنسان يوازن بينهم”

دمتم بخير..
وما حبيت أترك التدوينة بدون أن أكتب تعليقاً بسيطاً 🙂

Reply
إينـاس مليبـاري 24 نوفمبر 2011 - 11:06 ص

صدقت مرثد ف كلامك بجد :”)
بالمناسبة ، مرة مبسوطة برجعتك بعد غياب :”)
يسعدك ربي على تعليقك الجميل وحضورك الأجمل ،
مرحباً فيك دايماً ،

Reply
إينـاس مليبـاري 8 ديسمبر 2011 - 3:42 ص

كلامك جميل وسليم :”)
حضورك يثري الموضوع كالعادة ، ربي يسعدك :”)

Reply

اترك تعليقا