♥
السّــلام عليكم ورحمة الله وبركاته
قررت إنو التدوينة دي تكون باللهجة العامية/ الجداوية البحتة ^^ عشان تكون قريبة من الكل ، اللي خلاني أقرر أكتب التدوينة دي هوا نقاش دار – ولف واتسلق كمان ههههه – بيني وبين أكتر من صحبة – ياربي متعودة أقول صديقة وكلام مرتب ^^ – فقلت نوسّع دائرة النقاش .
تساؤلات : كيف يُظهر الإنسان شخصيتو الحقيقية اللي بحياتو الواقعية ويعكسها بالنت ( العالم الوهمي / الافتراضي ) ؟ هل الإنسان اللي شخصيتو ف الواقع مرح ومحشش وف النت ال ال الاحترام يعتبر شخصية متناقضة وغير سوية – ومستويّة ^^ ؟ هل نقدر نحكم على شخصية الكاتب اللي بالنت من خلال كتاباتو بس ؟
وجهة نظري هيا : إنو النت يفرض علينا حدود ما يسير نتجاوزها لأسباب كتيييرة ! ما أقصد انو الواحد يخفي شخصيتو ويرتدي اووبس اقصد يلبس ^^ قناع عشان النت مرة عالم وهمي ! أقصد إن النت له خفايا وأبعاد مالها حدود ، فهادا الشي يخلينا امممم ايش يسموه .. يخلينا نتحفظ عن بعض جوانب شخصيتنا :”) .
فـ اللي يشوف إيناس بالنت ويقرأ لها .. كلام منمق ومدري ايشكلو ! لو شافني بالواقع يمكن تجيلو صدمة عمرو ! لأن التنميق والتزبيط والكلام دا بس كتابة لكن بالواقع طبيعي الإنسان يكون على طبيعتو يضحك ويحشش >> كأنها تدافع عن نفسها ^^ ! الحياة مو كلها جدّ ومو كلها ضحك . ضروري الإنسان يوازن بينهم ، وزي كدا الإنسان مراح يكون جدّي في كتاباتو ومع أصحابو وف شغلو .
وحدة من صحباتي قالتلي إنو شخصيتك يا إيناس مرة غير !! يعني لو إني ما شفتك بالواقع حقول انك مثقفة وحقت كتابة وبس لكن لما شفتك بالواقع قلت هادي ماف راسها شي << طبعاً ما أقولكم كمية التحطيم اللي شعرت بيها بس الله جبر بخاطري ههههه . ووحدة تانية الله يستر عليها – أتمنى تكون تقرأني دحيين – قالت لي : استغرب من الناس اللي يحكموا على الكاتب من كتاباتو بس ويجزموا انو انسان كويس ومافي زيو ! يعني مثلاً انتي يا إيناس مررة مو انتي اللي تكتبي !! << طبعاً قالت كلام تاني بس لهنا وكفاية هههه أحس هيبتي طاحت و طيحتها بيدي ههههه .
وعن نفسي قابلت مدونتين عرفتهم من النت ، وحدة منهم سبحان الله أسلوب كتابتها بالمدونة من ناحية الجدية هيا هيا نفسها ماحسيت باختلاف أو فرق . أما التانية هههههه حبيبتي والله طلعت من جماعتي فيها من التحشيش ما الله به عليم فـ حسيت اني طبيعية وانو بجد الناس مو كلها زي بعض .
ضروري نتقبل بعض على اختلافاتنا ، حتى لو كنا نتوقع من الطرف التاني انو احسن مما كنا نحسّبو ! . حلو نحسن الظن بالتانيين ف كل حاجة مو نقول هادا والله همو رضا الناس عشان كدا يزبط كتاباتو وبس ! ، وخليني أتكلم عني وح أنصّب نفسي نائبة عن الناس اللي زي حالتي ( محششين ويضحكوا بالواقع وأنتكة بالنت ) أقولكم اننا لما ننمق الكلام ونظهر الشي الكويس اللي فينا هادا لأنو الإنسان يعطي كل ذي حق حقه ، ولا إفراط ولا تفريط ، يعني حلو يكون في شي جدي تشتغل عليه ف حياتك ( مواهبك ، هواياتك ، طموحاتك .. الخ ) وكمان حلو يكون في وقت فَنْ تنسى فيه انك كاتب وانك مدير ووزير .. حبايبي الحياة فيها رمادي مو يا أبيض يا أسود :”)
لكل الزائرين اللي عرفوني عن طريق النت وشافوني بالواقع : كيف لقيتوني ؟ ولكل الزائرين اللي ما حصلهم الشرف – ويحمدوا ربهم ليل نهار هههه – انهم يشوفوني : هل توقعتوا انو إيناس هيا إيناس اللي تكتب ؟
شكراً لكل اللي اتقبلوني بكل ( تناقضاتي ) بين النت والواقع ♥
حاجة تضحّك ، –
راجعت التدوينة أكتر من مرة عشان أتأكد انو مافيها ولا مصطلح بالفُصحى ، أحس كأني بسوي ذنب كبير ^^ !